بسمه تعالی

آخر ای بیچاره انسان بیر آییل وجدانی قان

هر زادیدا قانماسون آلاهی قان ایمانی قان

ادعا وقتینده دییسن من ملکدن برترم

امتحاندا رد اولیسان گل اوتی قرانی قان

خانمانی ترک ائدیب بیر آی گئدورسن حجه سن

لااقل بیر لحظه اوردا گوز آچب سبحانی قان

یدّی دفعه کعبه نی سرعتله ایلورسن طواف

بیر تامل ائت بیر آز لطف حق منانی قان

مکه بازارین ولی مین یول گزورسن صبریلن

آت تجارت عشقینی حجونده کی عنوانی قان

گر اورگون پاک اولا کعبه ائله قلبونده دی

قلبووی سندر،سنان قلبونده کی مهمانی قان

قانمیان قانماز اگر مین یول ئوله زنده اولا

لااقل سن ئولممیش توبه ائله غفرانی قان

چوخ اوشاق حتی بو ایراندا گجه لر آج یاتور

وای رقیه سویلمه گئت آج  قالان طفلانی قان

پولدارون وصفین دیورسن چاپلوسی ایلوسن

قارداشم مستضعفی درک ائت ضعیف انسانی قان

شیعه سن عدلون ترازوسین بهم ورما اوتان

منفعت اوستونده ورما بیر بیره میزانی قان

سویلمه الان جوانم فرصتیم وار توبیه

دای جوان ئولمگ اولوب عادی ،بئله جریانی قان

باخ درو دیوار شهره نصب اولان اعلانلارا

عکس جوانلار عکسیدی سن ای جوان برهانی قان

گل حسینون خطیّنه آیری مسیری گزمه سن

فرصتون وار گل کلاس و درس عاشورانی قان

بو حسین ابن علی چوخ مهرباندی هامیا

آستانین ئوپ صفای درگه سلطانی قان

عرشده چاتماز حسینون جلوه لی درگاهینه

خاک درگاهینده مین خورشید نور افشانی قان

گبراگر اولسون حسین والاه سنی سلمان ائدر

بو حسینون باخ ایاقی آلتدا مین سلمانی قان

ایستیورسن آلاها هردم اولاسان متصل

متصل اول سن حسینه عشقیلن عرفانی قان

بیر یره چاتدی حسین آلاه گلیبدی یانینه

اوندا اولمشدی حسینون یاره لی هر یانی قان

سلسبیلی زمزمی مات ایلمیشدی سینه سی

شدتیلن چون وریدی سینه سوزانی قان

قان آخوردی پیکرینن چشمه کوثر کیمین

جسمی اوستونده یوویدی هی آخان القانی قان

نیمه میدانی عباسون قانی ائتمیشدی رنگ

زخم مولا ایلمیشدی نیمه میدانی قان

تزبه تز سبحان دیوردی قانون آلتندا حسین

گوئیا گیزلتمیشیدی گورمین سبحانی قان

فخر ائدوردی قان فراته سویلیردی :ای فرات

سن دریغ ائتدون ،آلب آغوشینه سلطانی قان

سن حسینون ئوپمدون عطشان دوداقینن ولی

آقزنا تا دگدی اوخ ئوپدی لب عطشانی قان

سینه شاه شهیدان تا سوکولدی تیریلن

کربلایه دعوت ائتدی غمزده زهرانی قان

قان آخوردی سینه دن مولا گئدوردی حالیدن

ئولممیش غسل ایلیوردی یاره لی اعضانی قان

سن دئمه معمولی قانیدی آخوردی توپراقا

آلاهون قانیدی ،گورستدی رخ یزدانی قان

جنتون عرشون سماوات و کرات و گویلرون

هاموسنون روز عاشورا اولوب بنیانی قان

جان ورن لحظه حسین عالم اولاردی مضمحل

قویمادی نابود اولا لیک عالم امکانی قان

تا خود محشر بو خلقت اولدی مدیون حسین

قوملارا آخدی ولیکن  ساخلادی دنیانی قان

جنت الاعلا دولانیدی حسینون باشینه

مین جنان ائتمیشدی چونکی صورت و سیمانی قان  

بی هنر اعراب الیلن خلق اولوندی بیر هنر

خلق اولوب تندیس عشق اسلوبی قان ارکانی قان

قان آخیدی گون شاخیدی هو باخیدی صحنیه

خشک اولاندا گورسدیدی کلمه منانی قان

قان زبس ائتمیشدی زیبا صورت شاهنشهی

قتلگاهه ایلمیشدی مشتری حورانی قان

هر ایکی عالم حسینه اوندا اولدی مشتری

گرمیت ائتمیشدی بازاره داخی ارزانی قان

هامیدان کچدی قباقه ، دلبری زینب آلب

زلفی آق ،قدی خمیده ،دیده گریانی قان

سویلدی بو قانلی جسمون قیمتی قاندی فقط

آیری قیمت یوخ اولوبدی قیمت شایانی قان

اللرینن وردی قان ،آلدی حسینی سینیه

مرحبا عشق ،زیارت ایلیبدی قانی قان

زینبون قانی قارشبدی حسینون قانینه

محکم ائتدی ذریده ممهور اولان پیمانی قان

سویلدی زینب :عزیزیم آزدی قانیم عفو ائله

زینبون باید وریدی بوندان آرتق آنی قان

کوفه ده زینب سنه قارداش دوباره قان ورر

باش یارب ورم سنه ای فاطیمه ریحانی قا ن

هم علی هم فاطیمه هم مجتبا هم سن حسین

قان وریبسوز ساخلیبدی دینیله ایمانی قان

قانوون اوسته حسین من قویمشام آز قانیمی

قوی دئسونلر زینبون دینه اولوب احسانی قان

بیر سوالیم وار جوابین ور سینه ام قانه دونوب

دی گوروم آیا آپاردی سن کیمی سقانی قان