تبلیغات
♥سیاسی♥بین المللی ♥فرهنگی ♥دینی ♥اقتصادی ♥علمی ♥ورزشی ♥ - مطالب عاصم اردبیلی ایکو
 
 
پیغام مدیر :
با سلام خدمت شما بازدیدكننده گرامی ، خوش آمدید به سایت من . لطفا برای هرچه بهتر شدن مطالب این وب سایت ، ما را از نظرات و پیشنهادات خود آگاه سازید و به ما را در بهتر شدن كیفیت مطالب یاری کنید.
 
 
یئنی تکنیک
نوشته شده در یکشنبه یکم آبان 1390
ساعت : ساعت 15 و 40 دقیقه و 26 ثانیه
نویسنده : Hossein Ashrafi
لعنت اینترنتـه کی لال لاری گویا ائله‌دی

یوخی وار قاره نی آغ چیرکینی زیبا ائله‌دی

اته نه قوش لارینا قدرت پرواز وئریب

سوت دیشین توکمیه‌نی حکمته دارا ائله‌دی

آچدی علمین قاپی سین غرب ده انسان اوزونه

تکجه فکر اوغروسونو شرق ده احیا ائله‌دی

لوله‌یین گورمه‌یه‌نین آفتافا وئردی الینه

خورخورا دوشدو خبرآلمـا نه غوغا ائله‌دی

اوشاقین آلدی الین‌ده‌ن توته‌کی وئردی موبایل

او طفیل ده اونو دفترچه‌ی انشا ائله‌دی

یئتمیش ایل سانجی چکیب نیما بئجرده‌ن وطنی

آز زامان دا نئچه مین صاحب نیما ائله‌دی

شاملووون قویدو ایاغ چینینه قوزاندی گویه

اخوان نقشی‌نی اشعارده امحا ائله‌دی

فکر صاحب‌لری‌نین گنجینی تاراجه قویوب

رنج سیز بیرگئجه‌ده سارساقی سینا ائله‌دی

وزن‌ایلن قافیه‌نی شاققالایب آتدی ایته

حضرت حافظه بیر محکمه برپا ائله‌دی

سعدی‌نین قبری‌نی قازدیردی گلستانین‌ده

قتل فرمانی‌نی فردوسی‌یه امضاء ائله‌دی

مولوی‌نی ائله‌دی نفی بلد قونیه‌ده‌ن

اولو خاقانی‌نی شیروانیده رسوا ائله‌دی

نظم‌ده‌ن سالدی نظامی کیمی شعرین آتاسین

صائبین سبکی‌نی هند اوغلونا اهدا ائله‌دی

بیدل‌این کسدی دیلین دهلی‌ده باسدیردی یئره

سعـد سلمانی‌ده زندانیده ابقا ائله‌دی

شهریارین گوتوروب شعر تاجین باشیندان

گونش‌این چشمه سینی شب پره حاشا ائله‌دی

بوغدو حیدربابانی دوغدو مدرنیسمی بیزه

درده باخ اوندادا بی‌سرلری بی‌پا ائله‌دی

سیمین‌این دیوانی‌نی زوللادی آشغال قابینا

پروینی کهنه بئین شاعره معنا ائله‌دی

سایه‌نی حال حیاتی‌نده زمین‌گیر ائله‌ین

فروغی رتبه‌ده بیر شاعر نوپا ائله‌دی

ادبیات دنیزینده اوزه‌ن اوزگونچولری

بوشلایب گول‌ده باتان قطره‌نی دریا ائله‌دی

و بو اینترنت اگر وئردی تعالی بشره

بیزیم ایران دا بوتون اسفلی اعلا ائله‌دی

قارقانی قوزقونو دولدوردی ادب باغچاسینا

بولبولی داردان آسیب پشه‌نی عنقا ائله‌دی

ادبیاتیده چالـدی ادبین داش باشینا

یئنی معجونیده‌ن اخلاقی مجزا ائله‌دی

سرقته فرصتی بذل ائتدی شعر اوغروسونا

اودا اوز ذاتینی وبلاگ‌دا هویدا ائله‌دی

زلف اوزاندی قاش آلیندی دیشی‌لندی کیشی‌میز

لعنت اول تکنیکه مجنونو لیلا ائله‌دی

طاووسی ساتماق ایچون یوللادی مال میدانینا

دورری خرمهره‌یه بازاریده همتا ائله‌دی

اوز کوکون‌داندی اوشاق باغلادی بیگانه‌یه بئل

نه اوتاندی نه اوساندی نه ده پروا ائله‌دی

آتاسین دان بئخبر بیلدی اوز ائل‌داشلاری‌نی

نه بیلیم بلکه ده اوز سری‌نی افشا ائله‌دی

نه گیله فقرده‌ن ائتدی نه آخان قان یاشدان

نه تالانمیش‌لار ایچون صبر تمنا ائله‌دی

نه قارانلیق گئجه‌یه بیر جوما اولدوز چیله‌دی

نه دومانلیق به‌یه‌نن آزمانا ایذا ائله‌دی

نه بولاق اولدو آچیب یول آخا یار باغچاسینا

نه چراغ ایله‌ایتن یولداشی پیدا ائله‌دی

تکجه اوهام‌ایله شعرین پری سین سالدی تورا

چالیشیب صبحه کیمی نفسینی اغنا ائله‌دی

اعتراض نامه آدین قویدو هدر سوزلری‌نین

تا کی اوز شاه اثرین ائل‌لره اهدا ائله‌دی

تف سنین گردش دورانینا ای چرخ فلک

بو دولانماق کیمی گور کیم لره مولا ائله‌دی

عاصما بسدی دایان شعرینه صون قوی بونو دء

لعنت اینترنته کی لال لاری گویا ائله‌دی

استاد عاصم اردبیلی


:: مرتبط با: عاصم اردبیلی ,
:: برچسب‌ها: شعر ترکی یئنی تکنیک ,
 



چیخسا اوکی ده‌ن
نوشته شده در یکشنبه یکم آبان 1390
ساعت : ساعت 15 و 39 دقیقه و 12 ثانیه
نویسنده : Hossein Ashrafi

ساقی زامانین جبری منی سالسادا  هی ده ن

سرشار ائله جان ساغری نی قیرمیزی می ده ن

هجران ستمین ده ن اوجالیب گوگ لره ناله ام           

سوسدورمنـــی آنجاق سوروش احوالیمی نی ده ن

من مدرسه ده تکجــــــــه بو بیر نکته نی قاندیم           

مشکل آپارام فایـــدا(الف) ده ن یادا(ب)ی ده ن 

قانمـاق نه قه‌در چوخ او قه ده ر یانماقین آرتیق           

بختین بو  قه‌در  باغری نی چاتلاتما گیلی ده ن

دونموش بییینه  گون ده  کسر  یوخدور اریتسین           

بوشلا قوزئ یی باشلاما افسانـه گونئی ده ن

خرمایه یاخینلاش نئجــه کی حضرت زاهد           

گوزیومدی  خداده ن ولی گوز یوممادی ری ده ن

قاضی کی قضاوت ده اوگئی دوغمـاسی اولدو           

باج آلمالی دیر حشـره کیمی دوغما اوگئی ده ن

ایمان ائوی کفرین پیله گی ایلن یئخیلانـدیر

هریئرده اجل قصری اگر سست اولا پی ده ن

قانماز ائله قانمازدی باشـی عرشه ده چاتسا

یوخ فرقی پاریس ده ن اولا صادر یا رضی ده ن

باغلاردا یئرین برکیـده بیلسه قارا قارقا

بولبول چیخا بیلمـز یازا قورتارسادا دی ده ن

انسانی فنرمثلی کی یئغدین آچیلاندا            

گاه آنکارادان باش چیخـادار گاه دا دوبی ده ن

سانما کئ یئ یب ظلمکارا قارشی قلم لر 

تابوته دونر تخت قلم چیخــدی کی  کئی ده ن

ایسترسن اولاغ یوللانا قارداش یئمین آرتیـر            

عیسی ائله ین  معجزه نی اومما هـوچی ده ن

رستم سن اگر گوجلو اولانمازسن اجل ده ن              

سلطان سان اگرفایدالان افسانـه ی کی ده ن

جسمون  کی نهایت ده اولار  قورد قوشا قسمت             

منده ن سوز ائشیت ائیله حضر اوچ دانا پی ده ن

پول دور بو اوچون ان بویوگی  هر قده ر آرتسا              

قاپمــاق دا یقین سبقت آلارسان آنا لی ده ن

پارتی نظریم دیر او ایکینجی پی یه دایـر              

پارت ایلا آشان ایش سالاجاق پی سری هی ده ن

آیدین دیر اوچونجو پی علامت دی پلـوودان               

بوکسون کیسه سی گورنه یه وارث دی کلی ده ن

دوزگون سوزونه(عاصم) اگر مشتری قالسا              

ائل لر آرا نشر اولمالی دیر چیخسـا اوکی ده ن


:: مرتبط با: عاصم اردبیلی ,
:: برچسب‌ها: شعر چیخسا اوکی ده‌ن , انواع شعر ترکی ,
 



کوسموشم(عاصم)
نوشته شده در یکشنبه یکم آبان 1390
ساعت : ساعت 15 و 38 دقیقه و 28 ثانیه
نویسنده : Hossein Ashrafi

دوزموشوم اول قدر هجرانه دوزومدن کوسموشم

اوزموشم امید وصلتدن اوزومدن کوسموشم

اویموشام ایللر بو ظاهربین گوزون فتواسینه

اَیری لر دوز گورموشم، از بس گوزومدن کوسموشم

گورموشم چون مصلحت چنگنده طبعیم رام اولور

ائلدن الهام آلدیغیم شیرین سوزومدن کوسموشم

تکجه عاصم سونمه ییر سینه مده عشقین آتشی

سانما بئش گونلوگ سمندر تک کوزومدن کوسموشم

عاصم اردبیلی


:: مرتبط با: عاصم اردبیلی ,
:: برچسب‌ها: کوسموشم(عاصم) ,
 



سنی من گورممیشیدیم ولی سنلن تانیشیدیم نه دن؟
نوشته شده در یکشنبه یکم آبان 1390
ساعت : ساعت 15 و 37 دقیقه و 34 ثانیه
نویسنده : Hossein Ashrafi

بوباغین بولبولو بیرده ن بیره لال اولدو نه دن؟

قوزقونا قارقایا جولانه مجال اولدو نه دن؟

شانلی یازکسمیشیدی قاره قیشین بوز نفسین

یازا چیخمیش صونالار غرق ملال اولدو نه دن؟

هانکی صرصر الی پرپر ائله دی گول چیچگی

بو برومند آغاجین میوه سی کال اولدو نه دن؟

بیز کی جان جان دئمه دیک اولکه ده قان قان دئینه

سئوگی منظومه سی حال اهلینه قال اولدو نه دن؟

مِیِ انگوری سؤزوم یوخ کی حرام ایدی بیزه

انسانین قانینی نوش ائتمه ک حلال اولدو نه دن؟

بیز بیلردیک کی دوغولماز یئنی دن رستم زال

یوردون حرّاجه قویان رستم زال اولدو نه دن؟

ایسته دیک سیره چیخاق ماوی سمالرده بیر آن

سیندی قُول یاندی قاناد سیر محال اولدو نه دن؟

آی کیمین آیدین یدی (عاصمه) ناحقّیله حق

پس حقین قامت موزونو هلال اولدو نه دن؟

صالح عاصم اردبیلی 

به نقل از وبلاگ دکتر فیروزی


:: مرتبط با: عاصم اردبیلی ,
:: برچسب‌ها: شعر سنی من گورممیشیدیم ولی سنلن تانیشیدیم نه دن؟ ,
 



دوستلار گوروشو
نوشته شده در یکشنبه یکم آبان 1390
ساعت : ساعت 15 و 35 دقیقه و 13 ثانیه
نویسنده : Hossein Ashrafi

دوستلار گوروشونه آنا یوردومدان

کونول بوقچاسیندا سوز گتیرمیشم

ادب باغچاسیندا سولماز گوللره

آراز کیمین آغلار گوز گتیرمیشم

دالغالی دنیز تک جوشوب چاغلایان

ائلر یاراسینی آچیب باغلایان

چئوریب بولودا قان یاش آغلایان

شعریزه بیر چیمدیک دوز گتیرمیشم

اولو بابالاردان یادگارلارا

عاشیقلار جمعینده بسته کارلارا

تایسیز ایگیدلره وورغون یارلارا

منده بیر وورغونام اوز گتیرمیشم

شعرین اوجاغیندان قالخان کوزلره

اوزون گئجه لرده اویاق گوزلره

سینه لر یاتاغی اودلو سوزلره

سولطان ساوالاندان بوز گتیرمیشم

وورغونام او آیدین گئتدیگیز یولا

نه ساغا باغلی سیز نه ده کی سولا

گلمیشم سیزیلن وئرم قول قولا

خورجوندا نه ییم وار دوز گتیرمیشم

محبت ایپه گین آچیب سرمه گه

کونلوزون آغری سین بر آز درمه گه

ظولماتا گونش تک سینه گرمه گه

یانیقلی سازیمدا کوز گتیرمیشم

ائشیتدیم سوز قیزین بوردا آلان وار

عاصیمین باغیری تک داردا قالان وار

غزل باغچاسیندا نغمه چالان وار

قارا تئل سارا تک قیز گتیرمیشم

من آنا یوردومون بیر دیلمانجی یام

بیر جوما آرزی یام، شعرم، سانجی یام

دنیزلر اونونده ایتگین دامجی یام

گونشه دیرماشان توز گتیرمیشم

صالح عاصم اردبیلی


:: مرتبط با: عاصم اردبیلی ,
:: برچسب‌ها: شعر دوستلار گوروشو از صالح عاصم اردبیلی ,
 



سئوگی دن افسانه یاراد
نوشته شده در یکشنبه یکم آبان 1390
ساعت : ساعت 15 و 34 دقیقه و 11 ثانیه
نویسنده : Hossein Ashrafi

گؤزلیم! سالما گؤزوندن منی، بیگانه کیمین

اذن وئر، شوط ائدیم اطرافینی پروانه کیمین

بخت آئینه سی تک، سیل اوره گیندن کدری

تا صداقت باخیشیندان جوشا، میخانه کیمین

اوخو عشقین کیتابین، سئوگی دن افسانه یاراد

کؤنلومو شوقیله سرشار ائله، پیمانه کیمین

روحوم آشوفته دی، زولفون کیمی آی سیزدی گئجه م

بو پریشانلیغا بیر نظم یاراد شانه کیمین

گل گؤزللر آرا، بی رحمیلیگ آییننی پوز

سالما اؤز عاشیقینی چوللره، دیوانه کیمین

بولبولم، قهر زمان، باغدان اوزه ندن الیمی

قارا خالیندی چکن دامه منی دانه کیمین

گل ملامت داشی آلتیندا، بو بیچاره کؤنول

تالانیب قیش گونو، تاراجه گئدن لانه کیمین

گون کئچیب، آی دولانیب، ایللر اؤتوبدور هله ده

سینه ده ساخلامیشام گنجیمی ویرانه کیمین

گلمه دین، اوندا کی جان دردینه درمان واریدی

ایندی درمان دا منه درد دی جانانه کیمین

عاصمین طبعی، صداقت بولاغیندان سو ایچیر

گر چی دؤزگونلوگ، اولوب دهرده افسانه کیمین

عاصم اردبیلی


:: مرتبط با: عاصم اردبیلی ,
:: برچسب‌ها: شعر سئوگی دن افسانه یاراد از عاصم اردبیلی ,
 



گوزلرون ده نه وار
نوشته شده در یکشنبه یکم آبان 1390
ساعت : ساعت 15 و 33 دقیقه و 03 ثانیه
نویسنده : Hossein Ashrafi

گوزون دولوب سوزایلن بیلمیره م گوزون ده نه وار؟

اوزون گورن ده دیلیم لال اولور اوزون ده نه وار؟

باخان دا شـوق ایله شمشاد مثـلی قامت اینه

تاپانمیرام اوزومــو نازنین اوزون ده نه وار؟

آجی سوزون منه بال دان شیرین دی بیر سوزه گل

اوزون بویور بو معما نه دیر؟ سوزون ده نه وار؟

نه کوزدو کونلومو یاخدیقجا داغ لی لاله بیته ر؟

بو شـوره زاری گلستان ائده ن کوزون ده نه وار؟

عومور یازین دا کی کونلوم سن ایله یازلاندی

او یازلا یازلانیرام دادمیشام گوزون ده نه وار؟

او گون کی آیریلیقا چاره، دوز، دئدین هله لیک

اطاعتین ده وار عاصم گوره دوزونده نه وار؟

دئمه اوزون ده، سوزون ده، گوزون ده اولدوغونو

گوزون دولوب سوز ایلن کاش بیله ام گوزون ده نه وار؟

صالح عاصم اردبیلی


:: مرتبط با: عاصم اردبیلی ,
:: برچسب‌ها: شعر گوزلرون ده نه وار از صالح عاصم اردبیلی ,
 



گئتمه
نوشته شده در یکشنبه یکم آبان 1390
ساعت : ساعت 15 و 32 دقیقه و 12 ثانیه
نویسنده : Hossein Ashrafi

سن سیز اوره گیم ناره گرفتار اولو گئتمه

کئچمیش قارا گونلر منه تکرار اولو گئتمه

مین دردیمه درمان گتیریب نرگس مستون

گئتسون دل سودا زده بیمار اولو گئتمه

اون دورت گئجه لیک آی کیمی ساچ کونلومه یوخسا

زولفون کیمی آیدین سحریم تار اولو گئتمه

کونلوم قوشو چیخمازدی چمن سئیرینه سن سیز

سنلن گوزلیم مایل گولزار اولو گئتمه

حاشا گوله بیر گول اوزومه دهر ده سنسیز

گولشنده ده گوللر گوزومه خار اولو گئتمه

جان نقدینه بیر نازینی ساتسون آلارم من

کیم من کیمی اول نازه خریدار اولو گئتمه

عشاق آرا باشیم اوجالار داغ کیمی قالسون

اغیار آرا عاصیم قوجالیب خوار اولو گئتمه

استاد عاصم اردبیلی


:: مرتبط با: عاصم اردبیلی ,
:: برچسب‌ها: شعر گئتمه استاد عاصم اردبیلی ,
 



نازا قویدی
نوشته شده در یکشنبه یکم آبان 1390
ساعت : ساعت 15 و 30 دقیقه و 57 ثانیه
نویسنده : Hossein Ashrafi

بیر بوسه تمنّا ائله دیم یار نازا قویدی

قیشدیر دئدی وعده ی وصلین یازا قویدی

بیلمم منی گورجک نییه سرعتله سووشدی

یالواردیم ایاق تورموزا قویسون گازا قویدی

لطف ائیله دئدیم قویما بو عشقین کوزی سونسون

چونبلدی بیر آز مجمر عشقه آزا قویدی

اصرار ائله دیم لطفووی آرتیر بو حقیره

چوخلوق دئدی پوخلوقدی بناسین آزا قویدی

کونلوم قوشون، ازل؛ اوزی پروازه گتیردی

سونرا منی مرج ائیله مه گه قوشبازا قویدی

آهیم دالیسیجان او قَدَر کئش تک، اوزاندی

اولچوب حسابین ساخلاماقی بزّازا قویدی

برکیدی اَتیم پیشمه دی عشقین اوجاقیندا

باسدیردی کوله پیشمگیمی آشبازا قویدی

صادق بو غزلدن ایکی بیت ائیله دی انشا

لطف ائیله دی شعرین دالین عاصیم یازا قویدی

استاد عاصم اردبیلی


:: مرتبط با: عاصم اردبیلی ,
:: برچسب‌ها: شعر نازا قویدی , شعر نازا قویدی از استاد عاصم اردبیلی ,
 



زامان آغلاتدی منی
نوشته شده در یکشنبه یکم آبان 1390
ساعت : ساعت 15 و 29 دقیقه و 52 ثانیه
نویسنده : Hossein Ashrafi

آغلامازدیم زامان آغلاتدی منی

دوز یولوندان آزان آغلاتدی منی

گوردوم حسرتدی همالر سوموگه

ایشله ییر شاخدا سوموکدن ایلیگه

دوزوموزده اییلیر ایری لیگه

قالدی قانماز قانان آغلاتدی منی

آغلامازدیم زامان آغلاتدی منی

تک صبیر گلدی دئدیم ایش دوزه لر

قار گئدر، بوز ارییر یازدا گلر

نه بیلیم یازدا بوران باغری ده لر

یوخاچیخمیش گومان آغلاتدی منی

آغلامازدیم زامان آغلاتدی منی

دئدیلر بیر گون اولار ساز حالیمیز

قیتدیق اولسا واریمیز یاغ بالیمیز

ایندی کی اون تک اولوب ساققالیمیز

بو یالان سوز یامان آغلاتدی منی

آغلامازدیم زامان آغلاتدی منی

ظن ائدیردیم آغیر اولسا یارالار

یارالار آغریسین آنجاق یار آلار

نه بیلیدیم اوره گی یار یارالار

بیلمه مز لیکدی، قان آغلاتدی منی

آغلامازدیم زامان آغلاتدی منی

اره لر توشدو که جنگل جانینا

تولکی لر تور توخودو اصلانینا

طرلانی اووچی باتیر جاق قانینا

اوخدان آرتیق کامان آغلاتدی منی

آغلامازدیم زامان آغلاتدی منی

اری مز قالدی بیینده بوزوموز

گویده سایریشمادی بخت اولدوزوموز

نه قویون قالدی نه املیک قوزوموز

قوردا بنذر چوبان آغلاتدی منی

آغلامازدیم زامان آغلاتدی منی

من دئدیم باغلاسا یادلار قولومو

دایاقیم وار قورییا ساغ سولومو

قوپدی بیر چن که ایتیردیم یولومو

داغا باخدیم دومان آغلاتدی منی

آغلامازدیم زامان آغلاتدی منی

وای بیزه اولدی پوزولماز یازیمیز

مضراب اود توتدی قیریلدی سازیمیز

قالدی قیشلانمادا عاصم یازیمیز

یازی گول سوز یازان آغلاتدی منی

آغلامازدیم زامان آغلاتدی منی

استاد عاصم اردبیلی


:: مرتبط با: عاصم اردبیلی ,
:: برچسب‌ها: شعر زامان آغلاتدی منی استاد عاصم اردبیلی ,
 



گلمیشم
نوشته شده در یکشنبه یکم آبان 1390
ساعت : ساعت 15 و 28 دقیقه و 50 ثانیه
نویسنده : Hossein Ashrafi

گوستر اوزون کی سیر گلستانه گلمیشم

بیر زائرم زیارت جانانه گلمیشم

لطف ائله، ویرما، قهر داشین داغلی سینه مه

درگاهینه امیدله درمانه گلمیشم

ایللر بویو تحمل ائدیب هجر دردینه

بئش گون قوناق بو خانه احسانه گلمیشم

شرمنده یم اگر چی برازنده تحفه دنچ

جان نقدی الده، ملک سلیمانه گلمیشم

سن سیزلیگه دوزونمه میشم، گرچه قطره یم

مین شوقیلن قوشولماغا عمانه گلمیشم

کافر آدیلا گر چی قاپوندان قاوولمیشام

رحم ائیله باری، ایندی کی ایمانه گلمیشم

سیندیرمیشام جسارتیلن عقل سددینی

دیوانسرای عدلووه دیوانه گلمیشم

تا مهریلن غرور باشین ویرمیشام داشا

مهر نگاردن سر و سامانه گلمیشم

من عشق مجمرینده اوره کدن آلیشمیشام

تسکین درده، چشمه ی عرفانه گلمیشم

نیزار تک سیزیلتی چوکوب سوزلو سینه مه

هجران نوالی، منده نیستانه گلمیشم

عشق اهلی دیر، حقارتیلن باخما عاصمه

عالم بیلیر بو عرصه یه مردانه گلمیشم

استاد عاصم اردبیلی


:: مرتبط با: عاصم اردبیلی ,
:: برچسب‌ها: شعر گلمیشم ازاستاد عاصم اردبیلی ,
 



گل، گئت
نوشته شده در یکشنبه یکم آبان 1390
ساعت : ساعت 15 و 27 دقیقه و 52 ثانیه
نویسنده : Hossein Ashrafi

گل بوشان شان اوره گین قصه سین انشاءائله گئت

بیربه بیر ووردوغون اوخلاره تماشا ائله گئت

آیریلیق دان نظر ائت گوزده ن آخان قان یاشیما

قطره لرده ن توره نن چشمه نی دریا ائله گئت

گیزلی اسراریمی ائل ده ن ائله دیل ده ن دیله سال

سن ده مجنونونو ائللر آرا رسوا ائله گئت

داغلی یام بارلی باغین پنجره سین آچ اوزومه

قاراقیش دان قارالان باغریمی احیا ائله گئت

بیر باخیش سئوگی یه ایللر بویو حسرت ده وارام

گل گولوم گل اونو بو جان ایله سودا ائله گئت

قتلیمین حوکمونو سن سیزلیگیم امضا ائلئیب

گل بو محکومون اوزون حوکمونو اجرا ائله گئت

ظلماتین داش قلعه سین ده ن باشا داش یاغمادادیر

تکجه بیر جلوه قارانلیق دا تماشا ائله گئت

باخ بو وحشت ده بوغولموش آجی قیشقیرتی لارا

لال سکوت دان دوغولان های کویو معنا ائله گئت

گئجه نین باغلا قارا معجرین آیدین سحره

گوندوزون خیمه سینی اولکه ده برپا ائله گئت

عاصمین دردی آغیر اولسادا یونگول دو یوکو

گل بو قارقانمیش ایلان کوسمه مدارا ائله گئت

استاد عاصم اردبیلی


:: مرتبط با: عاصم اردبیلی ,
:: برچسب‌ها: شعر گل , گئت از استاد عاصم اردبیلی ,
 



نامرده دو وئرمه
نوشته شده در یکشنبه یکم آبان 1390
ساعت : ساعت 15 و 26 دقیقه و 34 ثانیه
نویسنده : Hossein Ashrafi

الهی هر نه وئرسون مرده وئر نامرده دو وئرمه

وطنداش حقّینه بیگانه یه حق وتو وئرمه

جلودار ائت بیزه دانانی دشمن اولسادا اولسون

آماندیر لطف قیل سوز قانمیان دوستا جلو وئرمه

کریم انسانه کرمان قالی سین وئر، فرش کاشان وئر

پخالت یورقانیندا یوخلایان شخصه پتو وئرمه

جناب قانمازا آت وئر، قاطیر وئر، مال داوار لطف ائت

پوزون آرتیر ماقا وئر قرمیزی نیسان، پژو وئرمه

سیچان آرتماقدادیر آرتیر پیشیکلر نسلینی امّا

سیچاندان باشقا بو حیوان اوچون حق میو وئرمه

قارینپا کیمسه نین شوربایه آرتیر رغبتین یارب

قوناقلیقدا عنایت قیل اونا میل چلو وئرمه

دئینگن کیمسه نین شرّیندن ایمن قیل قولاخلاری

عمل سیز واعظین آلت انگینه بیر بئیله تو وئرمه

دئمم میز بازی میزدن آیری ساخلا دیغلاسین اولسون

دییم بو فرقه یه وئر سونده میز چسب اوهو وئرمه

او کس که بورک سندن ایستیور باشلاره بورک قویسون

او شخصه باش وئریپسن عیبی یوخ امّا شاپو وئرمه

اوکی حیوان کیمین بیزلنمه سه مشکل یولا توشسون

بو حیوان خویلویا قیل مرحمت بیز وئر بزو وئرمه

اوکی مال حیوانی ایللر قویوپدور آرپایا حسرت

ائله مخلوقه یا رب جو وئر امّا آبجو وئرمه

خدایا مین کتابلیق قافیه بذل ائت غزل بازه

قیزیل بازه قیزیل وئر قات باقات پول وئر پلو وئرمه

حکیما «عاصمین» اشعارینه بیر کسیه دوزگوندور

خطاسین بیر به بیر عفو ائیله ییب اغیاره لو وئرمه

عاصم اردبیلی 2/2/87 اردبیل


:: مرتبط با: عاصم اردبیلی ,
:: برچسب‌ها: شعر نامرده دو وئرمه از عاصم اردبیلی 2/2/87 اردبیل ,
 



قانلی زمان
نوشته شده در یکشنبه یکم آبان 1390
ساعت : ساعت 15 و 25 دقیقه و 09 ثانیه
نویسنده : Hossein Ashrafi

گینه آلیپدی زامان شور عاشقانه می الدن

نگاری اوخشاماقا وئرمیشم بهانه می الدن

غزل آدیندا قیزین ساچلارین داراخلیاریدم

چیخارتماسایدی زمانه ماراخلی شانه می الدن

یارین کامان قاشینا کونلومو نشانه بیلیردیم

دییپدی تیر جفا وئرمیشم نشانه می الدن

حیات چشمه سینین ایزلرین گوزونده گورردیم

او گؤز یاتاندان آلیب عمر جاودانه می الدن

کونول قوشوم یووا سالماخدایام یاشیل چمن ایچره

خزان یئلی اسه ره ک آلدی آشیانه می الدن

ائلین ترانه لریلن دونه ردی جنته یوردوم

آپاردی بمبلا موشک سسی ترانه می الدن

ووراردی شعر آغاجی یازدا مین جوانه کونولده

قوجالتدی کونلومو قیش آلدی مین جوانه می الدن

خیال قاناد چالاراق «عاصم» ام سماده گزردیم

دمیر قانادلی لِی آلدی اوشَن فسانه می الدن

یئر اوزره اود یاغاراق سازکول اولدی سیمده قیریلدی

چیخارتدی جبر زمان چنگیلن چغانه می الدن

گل ای طراوتی پوزقون چمنلره گتیرن یاز

اوزانسا قیش آلاجاق طبع شاعرانه می الدن

عاصم کفاش اردبیلی 29 اسفند 1366 اردبیل- مجموعه ی شعر سوزلو گوزلر



:: مرتبط با: عاصم اردبیلی ,
:: برچسب‌ها: شعر قانلی زمان از عاصم کفاش اردبیلی 29 اسفند 1366 اردبیل- مجموعه ی شعر سوزلو گوزلر ,
 



گوزگو داش اولدی
نوشته شده در یکشنبه یکم آبان 1390
ساعت : ساعت 15 و 23 دقیقه و 50 ثانیه
نویسنده : Hossein Ashrafi

گوردون گوزه لیم گوزگو نهایت ده داش اولدو

باشلار ایاق اولماق دا ایاق دوندو باش اولدو

گوزده ن کیمی ائل آتدی گئدیب غیره ال اولجاق

گوزده ن نه فقط دوشمه دی گوز اوسته قاش اولدو

ایل لر بویو گوردوک قورویان آرخا سو گلسین

سو گلمه دی آنجاق کی گولوف لرده یاش اولدو

قارداش قاراداش دان آشاقی بولگو بولنده

قانلی دویوشون جان بازاریندا داداش اولدو

بیر سورمه لی گوز قالمیش ایدی پاخلا گوزون ده

گوز دگدی او بیچاره یه گوز چیخدی ماش اولدو

ایش دوندو چراغ سوندو سماده ن قیر الندی

اول گون کی قویون قوردولا "عاصم" هاماش اولدو

 استاد عاصم اردبیلی


:: مرتبط با: عاصم اردبیلی ,
:: برچسب‌ها: شعر گوزگو داش اولدی استاد عاصم اردبیلی ,